Posible manen a ngumato iti presyo dagiti produkto a petrolyo inton sumaruno a lawas gapu iti agtultuloy a problema iti suplay ti langis a gapuanan ti tensyon idiay Middle East.
Maibasar iti patta-patta manipud iti industriya ti langis babaen iti resulta ti Mean of Platts Singapore (MOPS) ken foreign exchange trading kadagiti napalabas nga uppat nga aldaw, posible a manayunan iti presyo ti diesel ken gasolina.
Mapatta-patta a ngumato ti diesel iti ₱1.00 agingga ₱1.30 tunggal litro, bayat a posible met a ngumato ti gasolina iti ₱1.20 agingga P1.50 tunggal litro.
Segun iti maysa a source manipud iti oil industry, agtultuloy a maapapektaran ti diesel gapu iti nangato a presyo ti krudo ken saan pay a narisut iti problema iti suplay ti langis iti sangalubongan a merkado.
Kabayatanna, agtaltalinaed a nangato iti presio ti gasolina gapu iti limitado a global supply ken ngumatngato a demand, partikular idiay Estados Unidos iti panangrugi ti peak summer season.
Uray no adda ti bassit a panagbababa idi napalpalabas iti presyo ti krudo gapu iti positibo a saritaan pangkappia iti nagbaetan ti Amerika ken Iran, kinuna ti source a saan pay a natalged iti garaw ti presyo gapu ta saan pay a sigurado no kaano a malpas iti tensyon idiay Middle East.
Kadawyan nga iwarwaragawag dagiti kompanya ti langis dagiti price adjustment tunggal aldaw ti Lunes ken maipatungpal daytoy iti Martes.###
