LA UNION – Panggep ita a mangidatag ti kaso kontra ti barangay chairman ti kakaskasar kalpasan a maipagarup a dinadaelna iti kinaannayas ti panagrambak idiay Barangay Pao Sur sa lungsod ng San Fernando, La Union.
Iti pannakiuman ti Bombo Radyo iti kakaskasar a ni Sherwin Apigo, kinunana a saanda nga ipagarup iti misisna ken dagiti kakabagyanda a ni pay Pao Sur Barangay Chairman Emilio Ducusin iti makagapu ti pannakadadael iti naragsak koma nga okasyon dagitoy.
Sigun kenni Apigo, idi rabii ti Oct. 28,2017 a kangitingitan ti ragragsak ket iniggaman ti kapitan iti mikropono kasaruno iti panagsaritana ti agkakadakes kontra iti emcee ken nagpalastog pay daytoy iti sango ti adu a tattao.
Awan ti naaramaidan ti bride ken nakasangit pay daytoy gapu iti nakababain nga inaramid ti punong barangay kalpasan a nasikuran ken nagsiawid ti kaadduan a dimar-ay ti okasyon.
Kinuna met ni Kagawad Loreto Galvez ti Barangay Pao Norte ken nagpaay kas emcee, nasayaat met iti panangawagna iti kapitan kabayatan nga addada ti wedding reception iti aldaw tapno mangipaay koma daytoy iti mensahe kadagiti nagkasar, ngem saan daytoy a nagsarita.
Naammuan met ti kagawad a maipagarup a kayat ti kapitan nga iti rabii daytoy nga agsarita ken ti mismo nga opisyal iti Barangay Pao Sur ti mangiparang kenkuana iti okasyon.
Saan a nasayaat kinuna ti emcee iti ipamatmat a tignay ti kapitan iti nasao a pasken gapu ta aminda ket nangipaay met iti respeto kenkuana.
Maipagarup a nakainum pay ti arak ti punong barangay idi a nagdiskurso daytoy iti okasyon.
Kabayatanna, kinuna met ni Department of Interior and Lcocal Government (DILG) Provincial Director Paulino Lalata a mabalin a mangidatag iti kaso ni Apigo ken Galvez kontra iti kapitan idiay opisina ti Sangguniang Panlungsod wenno Ombudsman.
Posible met kinunana a madusa ti barangay chairman no mapaneknekan iti akusasyon kontra kenkuana.
Nagpalagip met ni Dir. Lalata kadagiti barangay officials a no adda iti kapada nga okasyon ket nasken nga ipanamnamada ti kinaurnos iti pasken ken saan a mangidaulo dagitoy iti saan a panagkikinnaawatan.
Ginandat met ti Bombo Radyo nga alaeng ti palawag ti punong barangay babaen ti telepono ngem naammuan nga awan daytoy idiay balayda. (Abs Flores)
