LA UNION – Maidatagen idiay piskalya ti kaso a robbery kontra kadagiti dua a lallaki a maipagarup a nangserrek ken nagtakaw kadagiti alikamen ti retirado nga opisyal ti pulisya idiay syudad ti San Fernando, La Union.
Iti pannakiuman ti Bombo Radyo kenni C/Ins. Silverio Ordinado, spokesperson ti La Union Police Provincial Office (LUPPO), kinunana nga addan iti salwad ti San Fernando City Police dagiti suspek a maipagarup a nagtakaw kadagiti agkakapateg nga alikamen ni retired C/Ins. Benjamin Diagan.
Sigun kenni Ordinado, natukoy iti pakabigbigan dagiti suspek kalpasan nga ammirisen dagiti police investigators ti CCTV footage ken mabuya iti video ti panagserrek dagiti agtatakaw.
Immuna iti daytoy, mapatta-patta nga umabot iti nasurok P200,000 a balor dagiti kagawaan ti intaray dagiti suspek manipud iti balay ti retirado a pulis sa Barangay Sevilla ti nasao a syudad. (Abs Flores)
