LA UNION – Naidatagen idiay piskalya ti kaso kontra kadagiti uppat nga illegal recruiter a nangipatulod iti dua a therapist idiay Dubai.
Naammuan ti Bombo Radyo manipud iti Bauang Police Station, kaso a panaglabsing iti ‘Anti-Trafficking in Persons Act’ iti indatag ti biktima kontra kadagiti suspek.
Mangisayangkat met ti preliminary investigation ti piskalya tapno maammuan dagiti basaran iti reklamo.
Immuna iti daytoy, base iti salaysay dagiti dua a therapist nga agpada nga agnanaed idiay Bauang, La Union, maipagarup nga innalukoy isuda dagiti suspek a mangged idiay Dubai ken pimmanaw dagitoy ditoy Pilipinas idi October 17, 2017.
Idi a makasangpetda idiay airport maipagarup a nadlaw dagiti biktima a tourist visa ti iggemda, imbest a work visa.
Idiay Dubai, maipagarup nga imbalud isuda ti maysa nga agency ken saan nga iti namnamaenda a trabaho iti naipaaramid kadakuada no di ket prostitusyon.
Kalpasan iti sumagmamano a lawas ket insalakan isuda ti embahada iti Pilipinas ken napaawidda ditoy pagilyan.
