LA UNION – Naalarma ti Municipal Disaster Risk Reduction Management Office wenno MDRRMO idiay San Juan, La Union kadagiti nagsasaruno nga insidente ti pammaltog iti nadakamat nga ili.
Iti panagsarita ni MDRRMO Officer Gino Mabalot iti sango dagiti 41 a barangay kapitan ti nasao nga ili, kinuna na nga importante a makitinnulong dagiti barangay officials a manglapped iti pannakapasamak ti naduma-duma a krimen.
Impaganetget na pay iti importansiya ti kommunikasyon iti baetan dagiti barangay officials, Philippine National Police (PNP) ken iti MDRRMO babaen iti panangammo dagiti local officials iti numero ti telepono dagiti nasao nga opisina.
Kagiddan daytoy iti singasing a maaddaan ti hanheld radio dagiti barangay officials, nupay adda metten iti inaprubaran ti municipal government a pondo a paggatang ti radio a maiwaras kadagiti barangay idiay ili ti San Juan.
\
