BR LA UNION – Kaalyado iti pulitika ni President Ferdinand Marcos Jr. iti kontraktor nga adda iti likod ti inawagan ti Presidente nga awan serbi na a proyekto idiay Kennon Road Tuba, Benguet.
Maibasar iti records ti Department of Public Works and Highways (DPWH), ni Engineer Francis Cuyop ti agserserbi a general manager ti 3K Rock Engineering.
Ti nasao a construction firm ket addaan ti sole proprietor ken nangrugi ti operasyon na idi Enero 27, 2000.
Timmaray ni Cuyop kas pannakabagi ti lone district ti Ifugao idi May 2025 elections ngem inabak ni Atty. Solomon Chungalao.
Kimmandidato iti sidong ti Partido Federal ng Pilipinas (PFP) nga idaulwan ni President Marcos.
Ngem impaganetget ti Chief Executive nga awan ti kaalyado wenno kalaban kenkuana, iti mapaspasamak ita a crackdown kontra kadagiti kusit nga opisyal ken pribado a kontraktor a karaman iti anomalyado a flood control projects ti gobyerno.
