Nainget a kinondenar ti Korte Suprema ti pammapatay kenni Presiding Judge Joseph M. Wee Sit ti Branch 2 ti Regional Trial Court sadiay Isabela City, Basilan kalpasan a napaltogan idiay Zamboanga City ita nga aldaw ti Huebes, Nobiembre 12.
Maibasar iti report, napasamak ti pammaltog iti Tumaga-Putik Road sadiay Barangay Tumaga, Zamboanga City.
Iti statement nga inruar ti Korte Suprema, inted ti pakinakemna iti pamilya, kabagian ken kakadua ti pimmusay a judge.
Binilin ni Chief Justice Rodil V. Zalameda ti Office of the Court Administrator, babaen ti Regional Court Manager ken Executive Judge, a makiuman iti pamilia ti biktima tapno masigurado ti dagus a tulong-pinansial ken dadduma pay a kasapulan a suporta.
Makitinnulong met ti Korte Suprema kadagiti otoridad, babaen ti Office of the Judiciary Marshals, tapno maimbestigaran ti krimen ken mabigbig dagiti responsable iti pammaltog.
Impaganetget ti Korte Suprema a ti panangraut kadagiti judge ket saan laeng a pangta iti biag ken kinatalgedda no di pay ket iti nawaya ken patas a pannakaipaay ti hustisia iti pagilian.
Impasigurado pay ti Korte Suprema ti agtultuloy a panagreggetna a mangsalaknib kadagiti judges ken dadduma pay nga empleado ti Judicial kontra iti aniaman a pangta iti seguridadda.
