Inlawlawag ti Korte Suprema a saanen a kasapulan a maisubli dagiti pondo a sigud a nausar kadagiti programa iti sidong ti General Appropriations Act (GAA) ti tawen 2024 ken 2025, basta naipatungpal dagitoy iti naimbag a nakem.
Segun kenni Supreme Court Spokesperson Atty. Camille Sue Mae Ting, daytoy ket saklawen ti doctrine of operative fact, a mangbigbigbig iti kinaumiso dagiti naipatungpal a programa iti laksid ti panangideklara a saan a maitunos iti konstitusion dagiti mainaig a probision.
Gapu iti daytoy, saanen a kasapulan nga ibabawi ti dandani ₱500 bilion a pondo a naggapu iti ilegal a panagngato ti alokasion kadagiti nadakamat a badyet.
Kabayatanna, inlawlawag ni Ting a saan nga otomatiko a mapagsungbat ti desision dagiti opisiales a karaman iti panagngato ti pondo.
Kinunana a masapul a maipila ti naisina a kaso nga sibil, kriminal, wenno administratibo tapno maikeddeng ti pagsungsungbatanda.
Malagip nga indeklara ti Korte Suprema a saan a maitunos iti konstitusion ti sumagmamano a probision iti GAA ti 2024, 2025, ken 2026 gapu iti grave abuse of discretion ti Kongreso iti panangpangato iti alokasion para iti unprogrammed appropriations.
