Nangipaulog iti korte ti South Korea ti warrant of arrest kontra ti sigud a presidente da a ni Yoon Suk-yeol mainaig paylaeng iti panangideklara na ti pagbiit a martial law idi Disyembre 3, napalabas a tawen.
Dimmar-ay ni Yoon iti korte idiay Seoul idi aldaw ti Mierkules para ti pito nga oras a panagdengngeg mainaig iti panagadal ti arrest warrant a kidkiddawen dagiti prosecutors.
Naikkat ni Yoon iti kina-Presidente babaen ti Constitutional Court ti South Korea idi bulan ti Abril gapo iti nasao a martial law ken maad-adal itan nu adda iti panangabuso iti posisyon gapo iti inaramid na.
Idi metlaeng Disyembre 14 napalabas a tawen ket binotosan ti Parliamento ti South Korea a ma-impeach ni Yoon ngem kasapulan nga aprobaran pay daitoy ti Constitutional Court.
Naarestar isuna idi Enero kabayatan nga isuna paylaeng ket presidente ken napalubosan metlaeng idi Marso kalpasan a mabaliktad ti pannakaarestar na.
Nupay kasta, inawat ti Seoul Central District Court ti argumento ni Special Prosecutor Cho Eun-suk a nasken a maarestar ni Yoon gapo iti posibilidad a dadaelen na dagiti ebidensya.
Sumangsango ita ti sigud a presidente ti abuse of power, falsifying official documents, ken obstruction of official duties, nga adda amin pakainaigan na iti deklarasyon na ti martial law idiay South Korea.
Pinaglibakan amin ni Yoon dagiti alegasyon ti prosecutor pakairamanan ti kinunana a maysa a klase ti rebelyon, gandat a panangpabayag iti posisyon, kasta met iti panggep a mangpakulong kadagiti kalaban na iti politika.
Kabayatanna, nagballigi met idi bulan ti Hunyo ti mortal a kalaban na ti politika a ni Lee Jae-myung.
