Bumtak iti Bulkan ti Krasheninnikov iti Kamchatka Peninsula idiay Russia, kalpasan ti 600 a tawen, segun kadagiti siyentipiko.
Maipagarop a posible nga addaan pakainaigan iti nairekord a napigsa a gingined a timama iti makindaya a paset ti Russia idi napalabas a lawas a nangitonda dagiti pakdaar ti tsunami agingana idiay French Polynesia ken Chile.
Iti maysa a report ti Russia state news agency, dinakamat ti Kamchatka Volcanic Eruption Response Team a daytoy iti kaunaan a nairekord a panagbettak ti Krasheninnikov Volcano iti las-ud ti 600 a tawen.
Maibasar iti patta-patta ti ahensya, naudi a nakita iti panagbettak ti bulkan idi 1463 ken manipud idi ket awanen ti nairekord nga aktibidad.
Segun iti Emergency Services ti Kamchatka, dumanon iti 6 km iti kangato ti impugso nga abo ti bulkan.
Naingaton iti orange aviation alert iti bulkan a mangipaspasimudaag ti peggad kadagiti lugan pangtangatang gapo kadagiti nagwaras a dapo.
Agtultuloy iti panangmonitor dagiti otoridad iti kasasaad ti bulkan ken dagiti posible pay a seismic activity.
