(Update)LA UNION – Posible a planado iti pannakapapatay iti maysa a mannalon, a nasarakan laengen a natay iti igid ti kalsada idi agsapa ti Martes idiay Naguilian, La Union.
Iti eksklusibo nga interview ti Bombo Radyo La Union kenni Racquel Macay, kabsat iti biktima a ni Robert Lagasca, kinuna na a posible nga ammo dagiti suspek a sumang-at idiay Baguio City iti kabsat na, ken impagarop da nga imet daytoy iti dackel a kantidad ti kuwarta.
Numan saan pay a nalawag iti pamilya ti pudpudno a motibo iti krimen, dackel ti atap da nga adda pakainaigan na iti kuwarta ti napasamak a krimen, nangruna ket kalak-lako na kadagiti produkto nga apit na idi aldaw ti Lunes, Nobyembre 20.
Maipalagip a nagsagaba ti 24 a tama ti bagsol ken maysa a tagbat iti tengnged ti biktima a puon ti dagus a nakatayan daytoy.
Agtultuloy iti naun-uneg pay nga imbestigasyon dagiti otoridad iti nasao nga insidente.
