Pinapigsa ti Gobierno Probinsial ti La Union iti kinasagana iti panawen ti kalimidad kalpasan a naipaay kadagiti component local government units (LGUs) dagiti food ken non-food relief supplies kas paset ti disaster preparedness program.
Nangrugi idi Hunyo 8, 2026 iti prepositioning initiative iti panangidaulo ti Provincial Disaster Risk Reduction and Management Office (PDRRMO), maitunos iti direktiba ni Governor Mario Eduardo C. Ortega tapno mapapartak iti panagsungbat iti panawen ti didigra.
Karaman kadagiti naipaay iti food packs, mainom a danom, pagkargaan ti danom, hygiene kits, emergency ken medical kits, solar-powered radios, evacuation tents, ken dadduma pay nga emergency shelter materials. Inpasigurado ti PDRRMO a naurnos a nakadulin ken naka-inventory dagitoy para iti dagos a panangusar.
Nagbalin a katulongan ti programa iti Office of the Civil Defense, Philippine Amusement and Gaming Corporation, Association of Southeast Asian Nations, United States Agency for International Development, ken Department of Health iti panangipaay dagiti relief supplies.
Segun ti provincial government, dagiti naipaay nga alikamen ket mangpapigsa iti stockpile dagiti Municipal Disaster Risk Reduction and Management Offices (MDRRMO) ken mangpapartak iti panangidanon ti ayuda kadagiti apektado a komunidad iti panawen ti kalamidad.###
