LA UNION – Nakasaganan dagiti otoridad manipud La Union PPO ken dagiti naka-assign iti naduma-duma a police stations iti intero a probinsiya a makipaset iti BRIGADA ESKWELA 2018, nga idaulwan ti Department of Education (DepEd).
Segun kenni PCI Silverio Ordinando, police relation officer iti La Union PPO, a kalpasan iti maisayangkat a flag raising ceremony iti Camp Diego, dagus a mai-deploy dagiti pulis iti naduma-duma a pagadalan, partikular ditoy syudad ti San Fernando.
Nairanta daytoy tapno bantayan dagiti otoridad ti seguridad iti pagadalan bayat ti pannakaisayangkat ti Brigada Eskwela ken tumulong metten dagitoy nga agdalus iti masakopan ti pagadalan wenno agtarimaan kadagiti nadadael nga arwaten iti uneg ti eskuwelaan.
