La Union – Immapela ita ti Police Regional Office 1 iti publiko a saanen nga i-share wenno iruar pay iti video ti panangpatay kenni sigud a La Union Congressman Eufranio Eriguel idiay Barangay Capas, Agoo, La Union.
Iti pannakiuman ti Bombo Radyo kenni P/Supt. Marlon Paiste, public information office ti PRO 1, kinuna na a imbes nga i-share wenno i-upload ti video ket naim-imbag nga ikkaten laengen daytoy.
Mainaeg daytoy, inalluloy ti opisyal iti publiko nga agturong laeng iti kuerpo ti pulisya tapno sadiay nga ikamang dagiti impormasyon gaputa amangan makatulong pay dagitoy iti panangrisot ti kaso ti sigud a mammanday linteg.
Immuna ditoy, kinuwestiyon dagiti Eriguel ti special investigation task group gapu iti pannakaiwaras ti video footage ti CCTV iti social media maipapan iti pannakapapatay iti sigud a kongresista nga awan iti pammalubos ti pamilya no sadino nga mausar daytoy kas ebidensya para iti kaso.
