LA UNION – Nakasaganan iti La Union Police Provincial Office (LUPPO) para iti panagsubli da iti aksiyon maipapan iti nairutan pay a kampanya ti gobyerno laban iti iligal a droga.
Iti eksklusibo nga interview ti Bombo Radyo La Union kenni PCI Silverio Ordinado Jr, police community relation officer ti LUPPO, kinuna na nga iti agdama ket ur-urayen da laengen iti memorandum nga aggapo idiay Camp Crame tapno maamwan dagiti guidelines wenno allagaden iti panangipatungpal ti direktiba ni Pangulong Rodrigo Duterte nga isubli iti PNP ken dadduma pay a law enforcement unit maipapan iti war on drugs.
Daytoy ket laksid a PDEA iti agtaltalinaed a lead agency iti nasao a kampanya.
Mainaig ti daytoy, imbaga ni Ordinado a manipud iti pakabuklan a 576 barangays iti intero a probinsiya ti La Union, 490 ditoy iti affected barangays iti iligal a droga.
Manipud met iti nasao a 490 a bilang, 416 barangays iti maipagarop a drug cleared, base iti validated report ti Municipal Anti-Drug Abuse Council (MADAC) ken Barangay Anti-Drug Abuse Council (BADAC).
Gaputi dayta, adda pay nabatbati a 74 barangays iti sukisoken dagiti maseknan tapno naan-anay a pagbalinen a drug-cleared.
Nupay kasta, iti biang ti PDEA Region One, umabot pay laeng iti 217 barangays ditoy La Union iti validated a drug-cleared.
Kabayatanna, siniguro ni Ordinado nga agbalin a napinget iti trabaho da laban iti illegal drugs, gaputa target da a maideklara a drug-cleared iti intero a probinsiya agingga iti sumaruno a tawen.
