LA UNION – Impanamnama ti Municipal Disaster risk Reduction and Management Council (MDRRMC) Bacnotan La Union iti kinatalged dagiti umili ken turista a makipaset ken agbuya iti surfing fest idiay ili ti Bacnotan, La Union mangrugi inton Oktubre 27 agingga 28, 2017.
Malaksid idiay ili ti San Juan, iti surfing break ket maisayangkat pay idiay ili ti Bacnotan, partikular iti Barangay Quirino ken Barangay Galongen.
Iti eksklusibo nga interview ti Bombo Radyo La Union kenni Rommel Montepalco, local disaster risk reduction and management officer ti nasao nga ili, kabinnulig da ti PRC, PDRMMC ken Phil. Coastguard iti pannakaiganwat ti nasao a programa.
Imbinsa-binsa na nga inton Oktubre 27, maisayangkat ti beach volleybal elimination ken iti karabyan na ket ag-perform ti maysa a national band manipud Manila.
Bayat nga inton Oct. 28 maisayangkat iti beach volleyball championship, snorkling, surf board design contest, sand castle making, kayaking, ken battle of the band iti karabyan na.
Namnamaen met ti lokal a gobyerno, a madoble ita dagiti turista nga agturong iti nasao nga event.
Naamwan nga idi tawen 2016, aganay 10,000 a lokal ken gangannaet a turista iti nakiragragsak iti nasao nga event.
Kabayatanna, idiay ili ti San Juan a pinaka-sentro ti Surfing Break ket namnamaen nga ad-adu pay a bisita ken turista iti sumangbay sadiay.
Siniguro met ti La Union Police Provincial Office (LUPPO) babaen kenni PCI Silverio Ordinado, chief of Police Community Relations (PCR), iti seguridad ken kina-annayas dagiti nasao a lugar.
Kinuna na a nakasagana iti security preparations dagiti otoridad para iti nasao a ganwat idiay ili ti San Juan ken Bacnotan, iti pannakibinnulig ti Phil. Coastguard, Phil Red Cross La Union Chapter, ken dadduma pay a security volunteers.
Binalakadan pay ni Ordinado dagiti party goers a liklikan ti nalabes a panaginom ti arak tapno maliklikan met dagiti insidente ti pannakalmes nangruna ket dadackel ti dalluyon iti baybay kadagiti nasao a lugar.
