LA UNION – Naideklara a dead-on-arrival idiay Bacnotan District Hospital idiay Bacnotan, La Union iti maysa a 25-anyos a lalaki, a nalmes iti kabaybayan idiay Barangay Pandan ti nasao nga ili.
Nabigbig iti biktima a ni Sonny Boy Buccat, baro, ken residente ti Barangay Bitalag, Bacnotan.
Maibasar iti report, iti biktima kadwa na dagiti gagayyem na ket napan nagpicnic ken nagdidigos iti kabaybayan iti nasao a lugar.
Iti panagturong ti biktima iti adalem a paset ti baybay, saan metten a nakalung-aw daytoy agingga a napukaw.
Iti panagresponde ti MDRRMC, PDRRMC, Coastguard ken Bacnotan PNP, nangisayangkat da iti search and rescue operations iti kabaybayan ket nakita da laengen iti bagi ti biktima iti igid ti baybay, a maipagarop a saanen nga agang-anges.
