(UPDATE) Nasarakanen itay alas-6:15 ti agsapa idiay Almeida, Balaoan ti bangkay ti lalaki a nalmes idiay Darigayos, Luna, La Union idi aldaw kalman, Hulyo 14.
Nabigbig ti bangkay a ni MARK ANTHONY AREOLA CARIG, 26-anyos ken residente ti Poblacion, Bacnotan, La Union.
Maibasar iti impormasyon nga immunan a nakalap ti Bombo Radyo La Union manipud Luna Police Station, alas-12:15 idi aldaw kalman, Hulyo 14, ti biktima ken ti kasinsinna a ni Roi Oredina, 30-anyos, baro, maysa a construction worker ken residente met laeng ti Barangay Poblacion, Bacnotan ket naginom ti arak iti cottage a kukua ni Nicole Cortez.
Apaman a nakaibus dagitoy ti dua a bote ti arak ket timmapogda ti baybay.
Bayat iti panagdigus dagitoy ket kellaat a ginuyod ti napigsa nga dalluyon ti biktima agingga a saanen a nakitapay ti kasinsinna isu a dagus daytoy a nagpaarayat.
Gapu ti daytoy, nangisayangkat iti search and rescue operation dagiti otoridad idi kalman ngem napaay dagitoy gapu iti napipigsa a dalluyon.
Ti pannakiuman ti Bombo Radyo La Union ken PMaj Cresencio Abila Chief-of-Police ti Balaoan Police Station, posible a nag-cramps wenno nagbetteg ti saka ti biktima a nangitunda ti pannakalmes daytoy.
Nagballaag met ni PMaj Abila a liklikan ti tumapog ti baybay no nakainom iti arak ken no makita a dadakkel ti dalluyon gapu ta napeggad daytoy.
