Imbatad ti abogado ni sigud a Presidente Rodrigo Roa Duterte a saan dan a masdaaw kadagiti naisubmitir nga ebidensya idiay International Crmininal Court (ICC) seknan dagiti panangabuso idi war on drugs ditoy Pilipinas.
Segun kenni Atty. Nicholas Kaufman, nupay saan na pay a mabalin nga ibutaktak ti reaksyon ni Duterte wenno strategy ti kampo da, nainget da met nga adalen ti aganay 2,300 a dokumento nga insubmitir ti prosekusyon manipud Hulyo 1 agingga 4; sumagmamano kadagitoy ket dumanon pay iti 100pages ti tunggal maysa.
Innayon pay ni Kaufman a buklen ti legal team da kadagiti siyam nga eksperto a nakapamaysa iti panagsagana para iti confirmation of charges hearing inton umay a Setyembre, agdama a tawen.
Manipud iti baro a dokumento a nairuar idi Hulyo 10, inyunay-unay manen ti kampo ni Duterte nga awan ti hurisdiksyon ti ICC iti kaso na mainaig ti nadara a kampanya kontra droga idi isuna ket Mayor paylaeng ti ciudad ti Davao kasta met iti nagbalin isunan a Presidente ti Pilipinas.
Kabatayanna, impannakkel met ni Kaufman ti panagsuporta ti dadduma a Pilipino iti panawagan a panangpasubli kenni Duterte kas iti resolusyon ni Senador Alan Peter Cayetano para iti house arrest. Innayon na pay a nasken a laeng a madengngeg ti kaso ti sigud a presidente babaen ti sistema ti hudikatura ditoy pagilian.
Nu met maipapan iti salun-at ni Duterte ket innayon ni Kaufman nga adda ita iti natalged a kondistyon ti tao, laksid iti tawen ken agingga uppat a bulanen a pannakadetene idiay The Hague, Netherlands. Saan pay kunana a maiyannatop iti mangiruar ti health bulletin gapo iti karbengan ti salun-at iti akusado.
