Mailunglungalong idiay Senado ti Senate Bill 2134 nga addaan panggep nga aramiden a libre ken lifetime validity dagiti PWD Identification Cards para kadagiti kualipikado nga addaan ti permanente a kapansanan.
Impaganetget ni Senador Mark Villar, iti author ti singasing, a saanen a nayunan pay iti rigat a mapadpadasan dagiti PWD wenno persons with disabilities.
Segun iti rekord ti National Council on Disability Affairs (NCDA), nasurok 2.5 milyon a Pilipino dagiti nakarehistro a PWD iti pagilian.
Nupay kasta, ado kadakuada ti marigrigatan iti panangala kadagiti benepisyo ken serbisyo ti gobyerno gapu iti parikut iti registry system ken agsubli-subli a rekisito iti dokumento para iti panag-renew ti ID tunggal lima a tawen.
Iti sidong ti singasing-linteg, saanen a masapul nga ag-renew tunggal lima a tawen dagiti PWD nga addaan ti permanente a kapansanan, ken masigurado a libre iti pannakaala dagiti lifetime-validity PWD IDs.
Masapul met a sertipikado ti Municipal wenno City Health Office ken ma-verify ti Local Social Welfare and Development Office iti naideklara a permanent disability.###
