LA UNION – Mangipaay iti City Government of San Fernando ti libre a bakuna kontra rabies para kadagiti taraken nga aso ken pusa, kas paset iti panagrambak ti Rabies Awareness Day inton Marso 11, 2026.
Ti aktibidad ket idauluan ti Office of the City Veterinarian idiay Barangay Tanqui ken silulukat para kadagiti bonafide nga agnanaed ditoy ciudad.
Inlawlawag ti City Veterinarian’s office a 100 laeng nga slot iti mabalin a mabakunaan iti kaaldawan ti aktibidad, isu a maibalakad kadagiti interesado a pet owners a nasapa nga agturong iti City Veterinarian’s Office tapno makaala ti slot.
Panggep ti programa a salakniban dagiti taraken manipud iti rabies ken papigsaen iti kampania ti gobierno a malapdan iti panagwaras ti sakit.
Agtultuloy iti panangparegta ti lokal a gobierno iti publiko nga agbalin a responsable nga agtagikua iti taraken babaen ti regular a panangbakuna kadagiti taraken ken panangtungpalda kadagiti programa ti salun-at ti ciudad. (Report by Bombo Ericka)
