LA UNION – Nangrugin iti registration para kadagiti interesado nga agay-ayam iti Pickleball Tournament ti City Government of San Fernando, a nakatuding a maisayangkat inton Marso 15, 2026 idiay La Union Cultural Institute (LUCI) manipud alas-dyis ti bigat aginggana alas-siete ti rabii.
Silulukat ti nasao a torneo iti aniaman nga edad, kadagiti residente ken empleyado ti ciudad, estudyante a naka-enroll kadagiti pagadalan, kolehiyo, ken unibersidad, ken atleta manipud kadagiti mabigbig nga sports ken recreation clubs nga akreditado ti ciudad.
Para kadagiti kayatna ti makipaset, kasapulan ti Duly accomplished Registration Form a maala iti Local Youth Development Office, 2nd Floor, Marcos Building ken biruken ni Ms. Angelika Aromin. Agpaut iti registration aginggana Marso 6.
Ti Men’s ken Women’s Doubles ket mabingay ti Novice ken Intermediate Category, ken tunggal dibision ken kategorya ket addaan laeng ti walo a pares, isu a kasapulan ti nasapa a panagrehistro.
Segun iti anunsio ti Local Youth Development Office, panggep ti nasao a torneo nga ikkan dagiti atleta—novices man wenno experienced—iti gundaway a mangipakita iti kinalaingda iti isport nga agtultuloy a dumakdakkel iti pagilian ken iti probinsia ti La Union.
Para iti ad-adu pay nga impormasion, mabalin a kontaken ni Mr. Fred Flores III, Sports Tayo Coordinator, iti 0968-587-2549.###
(Reference: City Government of San Fernando, La Union)
