LA UNION – Nangipeksa iti arungain kontra iti lupong tagapamayapa ti 60-anyos a lola a maipagarup a biktima iti gandat a panangrames idiay Barangay Buringet, syudad ti San Fernando, La Union.
Iti pannakiuman ti Bombo Radyo kenni lola Lourdes, kinunana nga awan ti panggepna a makirinnisot iti mairekreklamo a ni Artemio Fusilero idi a nagsasarita dagiti idiay barangay hall kaddua dagiti lupong tagapayapa ken ni Kapitan Nelson Fusilero Sr.
Maipagarup a pilpiliten iti respondent ken sumagmamano nga opisyal ti barangay a papirmaen daytoy iti amicable settlement gapu ta nadagsen ti indatagna a reklamo.
Saan met a nagkamang daytoy iti barangay hall tapno agreklamo gapu ta ti nasao a kaso ket addan iti sidong ti piskalya.
Pimmanaw ti nasao a lola idiay balayda ken manginanaed laengen daytoy iti kabagyanna gapu ti maipagarup a pangta ti respondent.
Ipabus-oy na laengen iti piskalya ti nasao a kaso.
Saan met a pinatgan iti respondent ken ni Kapitan Fusilero Sr. iti interview ti Bombo Radyo kadakuada.
Ngem aminado ti punong barangay nga adda met iti panagbiddutna a nagaramid ti nasao nga amicable settlement.
Kabaytanna, nnagpalagip met ni Lupon Tagapamayapa Federation of San Fernando City President Oscar Halabaso kadagiti opisyal ti barangay a saan a mabalin nga agaramid ti amicable settlement iti kaso a frustrated rape wenno ti dadduma pay a nadadagsen a krimen ti lupon tagapamayapa ken ti laeng pangukuman iti mabalin nga agaramid daytoy.
Kasapulan met kinunana a suruten iti protocol ti panangpapirma iti nasao a tulag ken kasapulan a maawatan iti agsinnumbangir a benneg ti nilaon daytoy sakbay a mapirmaan.
