LA UNION – Dagus nga impasidong ti Quad Committee ti kontrobersiyal a police official a ni Lt. Col. Jovie Espenido tapno mangipaay ti testimonya maipapan iti drug war a naimatanganna kas chief of police idi umuna a tawen ti pannakaipatungpal daytoy.
Indetalyena nu kasatno a nakaawat iti tawag manipud ken ni sigud a PNP Chief Ronald “Bato” De la Rosa tapno ma-assign a hepe ti pulisiya idiay Albuera, Leyte Police Station.
Dagus na met nga inawat daytoy karaman iti pammilin a parmeken ti maipagarop nga illegal drugs operation nga indauluan ti nabirngasan a bigtime drug lord a ni Kerwin Espinosa.
Impannakkelna nga iti las-ud ti 18 nga aldaw, naaramidna a parmeken ti drug ring ni Kerwin ken naan-anay a simmuko ti amana a ni sigud a Mayor Rolando Espinosa.
Ngem natay ni Mayor Espinosa idi agangay bayat ti kaaddana iti uneg ti Baybay City Provincial Jail.
Natiliw met ni Kerwin idi agangay iti sabali a pagilian babaen ti panagtitinnulong ti intelligence community.
Nupay kasta, iti uneg kunana ti sumagmamano a bulan a panagtalinaedna kas hepe ti pulisiya, tinakderan ni Espenido nga awan ti natay iti sidong ti kampanya kontra iti illegal a droga.
Idi Hulyo 13, 2016 sumagmamano laeng nga aldaw kalpasan a nagtugaw ti sigud a Presidente Duterte, na-assign ni Espenido kas chief-of-police ti Albuera, Leyte.
Idi Oktubre 16, 2019, nagserbi a Deputy City Director for Operations iti Bacolod City Police Office idiay Western Visayas.
Iti laksid ti panagbalin ni Espenido kas drug war lieutenant, ninagan isuna ni sigud a DILG Secretary Eduardo Año a karaman iti drugs watchlist ni sigud a Presidente Duterte.
