BR LA UNION – Immandar ti Land Transportation Office (LTO) a suspendiren ti 90 nga aldaw iti driver’s license dagiti engineers ti Department of Public Works and Highways (DPWH) a karaman iti anomalya ti flood control projects.
Pakaibilangan ditoy dagiti naikkat nga isuda DPWH Bulacan First District Engineer Henry Alcantara ken Assistant DIstrict Engineer Brice Hernandez.
Karaman pay a naipa-suspinde ti lisensiya dagiti nabirngasan a “Bulacan Group of Contractors” wenno BGC boys nga isuda Arjay Domansig, Edrick San Diego ken Jaypee Mendoza.
Kasaruno daytoy iti panangaklon ni Alcantara idiay Senado a nagusan dagitoy ti peke a nagan ken peke nga ID tapno makaay-ayam da iti casino.
Sinukimat ti LTO iti inruar a drivers license ni Alcantara ket naamwan nga awan ti inisyu da.
Dagiti met nabirngasan a BGC Boys ket nabilin nga agsumite ti palawag agingga Biyernes iti opisina ti LTO.
