LA UNION – Nagbalin a trending iti social media ti maikadwa nga State of the Provincial Address (SOPA) ni Governor Rafy Ortega-David gaputa nagbalin a tensiyonado kalpasan a simmungbat iti betla ni Vice-Governor Mario Ortega.
Naisayangkat ti SOPA idi malem kalman, Hulyo 2, iti mismo a provincial capitol.
Iti nasurok 35 a minuto a panagbetla ti goberrnador, imbinsa-binsa na dagiti narugyan ken naipatungpal a programa ken proyekto ti administrasyonna ken dagiti saan pay a naipatungpal gaputi saan a pannaka-aprobar ti pondo ti Sanggunian Panlalawigan.
Partikular a dinakamat ni Governor Ortega iti proyekto a pondoan ti World Bank nga aggatad ti 300 million pesos para ti farm to market road manipud Philippine Rural Development Program nga indauluan ti Dept. of Agriculture.
Bayat ti panagbetla ni gobernadora, nangaramid iti request for special session ket intuding na inton July 5, aldaw ti Biyernes para kadagiti urgent project and programs a saan a naipatungpal gaputi saan a pannaka aprobar ti supplemental budget dagitoy.
Kalpasan ti panagbetla ti gobernadora, kinellaat ni Vice Governor Mario Ortega iti amin a dimmar-ay iti nasao nga event.
Iti saan a ninamnama, nagbetla daytoy iti sango ti gobernador, provincial board, ken dadduma pay a dimmar-ay a pakairamanan ti media tapno ipeksa dagiti kunana a pagkur-kurangan ti gobernador ken umno a panangtaming kadagiti problema a pakaseknan ti probinsiya ken uray ti pamilya.
Ni Governor Rafy Ortega ket apo ni Vice-Governor Mario Ortega gaputa kabsat na iti lolo ti gobernadora a ni ex-Governor Manoling Ortega.
