LA UNION – Indatag ti Makabayan coalition ita nga aldaw, Disyembre 4, iti maikadwa nga impeachment complaint kontra kenni Vice President Sara Duterte seknan iti maipagarop a biddut a pananggastos iti P612.5 milyon a confidential funds idi 2022 agingga 2023.
Naidatag ti immuna nga impeachment complaint kontra kenni Duterte idi Lunes, December 2, babaen ti advocacy groups.
Umabot ti 75 nga indibidwal manipud naduma-duma a sektor ti timmakder a complainant ken tallo a mammanday linteg ti nangiyindorso idiay Kamara.
Dagitoy ket isuda ACT Teachers Rep. France Castro, Gabriela Rep. Arlene Brosas, ken Kabataan Rep. Raoul Manuel.
Iti 45 a pinanid a reklamo, naakusaran ni Duterte iti “betrayal of public trust” gaputi maipagarop a panang-waldas ti confidential funds, sistematiko a panangkalub iti kinakusit babaen kadagiti pinarbo nga accomplishment reports, ken dadduma pay a dokumento a naisumite iti Commission on Audit; ken gandat a panang-lapped iti imbestigasyon ken panangsukimat ti Kamara.
Segun kenni Makabayan President Liza Maza , iti panangwaldas ti confidential funds ket maibilang a panang-gulib dagiti umili, saan a simple a technical violation ngem ketdi sistematiko a panangwaladas ken panagtakaw iti pondo ti gobyerno.
Mangnamnama ni Bayan Muna Rep. Neri Colmenares, a tumaktakder nga impeachment counsel, a dagus a maipatilod ti Kamara iti reklamo idiay Senado.
Mangnamnama ni Colmenares a mangisayangkat ti Senado ti maysa a “fair and speedy trial” tapno magun-od dagiti Pilipino iti hustisya.
Kabayatanna, dua a mammanday linteg iti House of Representatives iti mangiproseso ti impeachment complaint, maiyannurot iti constitutional mandate.
Bayat a ni House Secretary General Reginald Velasco iti mangi-transmit iti dua a reklamo iti Office of the Speaker.
