Indiaya ni Senator Panfilo “Ping” Lacson nga itukon ti panagsagana iti Super El Niño ken dadduma pay a napateg a pagkasapulan ti pagilian iti posible a matipid iti panagkissay ti singasing a budget ti Senado para inton tawen 2027.
Segun kenni Lacson, mabalin a dumanon ti P2 bilyon iti maikissay a budget ti Senado, bayat nga al-allukoyen na met iti House of Representatives a saanen nga ituloy iti plano a nayunan ti P5 bilyon iti pondo da.
Kas chairman ti Senate Committee on Accounts, kinuna ni Lacson nga agserbi kas pangarigan ti panagsalimetmet ken disiplina iti panaggastos ti gobierno iti addang ti Senado, aglalo kalpasan iti desisyon ti Korte Suprema a nangideklara a panaglabsing iti Konstitusyon dagiti sumagmamano a probisyon kadagiti national budget idi tawen 2024, 2025, ken 2026.
Imbaga ti senador, mabalin nga usaren iti posible a matipid a P7 bilyon tapnu sungbatan dagiti kasapulan a saan a dagus nga masungsungbatan ti gobyerno, karaman iti namnamaen a nakaro nga epekto ti Super El Niño.
