LA UNION -Nagkedked a mangipaay ti waragawag iti Palasyo ti Malakanyang seknan iti “pardon” a posible a maipaay iti Pinay drug mule convict a ni Mary Jane Veloso.
Segun kenni Executive Secretary Lucas Bersamin, iti prayoridad ita ni President Ferdinand Marcos Jr., ket iti panagsubli ditoy pagilian ni Veloso a naibalud idiay Indonesia ti dandani 15 a tawen.
Kinuna ni Bersamin, ‘no comment’ da pay laeng seknan iti posible a pardon nga ipaay ni President Marcos.
Immunan nga inwaragawag ti Department of Foreign Affairs a nakatuding a sumangpet ditoy pagilian ni Veloso inton bigat.
Segun kenni Foreign Affairs USec. Tess Lazaro, alas-12:50 ti parbangon ita nga aldaw ti Miyerkules iti flight ni Veloso ket agarop alas-6:00 ti agsapa nu bigat a sumangpet ditoy pagilian.
Napalalo met iti panagyaman ti Pilipinas iti Indonesia gaputa impalubos na a maiyawat ti kustodiya ni Veloso iti Pilipinas.
Kinuna ni Bersamin, iti panagsubli ditoy pagilian ni Veloso ket bunga ti dekada a pannakisarita, konsultasyon ken diplomasiya.
Innayon pay ni Bersamin, a maragsakan ti Marcos administration iti panagsubli ditoy pagilian ni Mary Jane.
