Inwaragawag ti Commission on Elections a pabor da ti mall voting ngem dagiti tradisional a polling places iti daytoy umay nga eleksion.
Gapu ta umadanin ti eleksion inton Mayo, naituding nga umarangkada dagiti lugar nu sadino ket mabalin a pagbotosan dagiti uneg ti malls.
Segun iti pannakangiwat ti Commission on Elections a ni Attorney John Rex Laudiangco, talaga a kayat ti komision ti mall voting.
Inlawlawagna a mabalin a mapalag-an ti nasaknap a vote buying gapu ta adda dagiti CCTV cameras iti uneg dagiti kasta nga establisimiento.
Kasta met a mapukaw ti buteng iti krimen ken pammutbuteng gapu ta kunana, adda dagiti security guard ken screening sakbay a sumrekda kadagiti mall.
Malaksid iti daytoy, kinuna ti speaker a manamnama met a lumaka ti proseso ti panagbutos ti maysa nga indibidual.
Impannakkelna nga itan ket addan dagiti retrato iti listaan nga pagbasaran dagiti manursuro a mangimaton ti panagbotos.
Kabayatanna, iti miting ti Kapisanan ng mga Brodkaster ng Pilipinas, kiniddaw ni Commission on Elections spokesperson Attorney Rex Laudiangco ti panagtitinnulong tapno maiparang iti publiko no kasano ti agbalin a responsable iti panagbutos ita nga umay nga eleksion.
