Pimmusay ti maysa a mannalon kalpasan a tinagbat ti kabsat na idiay Barangay Nagsabaran Sur, Balaoan, La Union idi rabii.
Nabigbig iti pimmusay a biktima a ni Dante Nalayog, 36, baro, idinto a ti suspek ket ni Dominador Cadaon, 47, addaan asawa, maysa met laeng a mannalon, agpada dagitoy nga residente ti nasao a lugar.
Maibasar iti imbestigasyon iti Balaoan Police Station, sakbay ti insidente ket agin-inom ti biktima ken iti suspek agarop alas 5:30 idi malem kalman.
Idi dimteng ti rabii ditoyen a kinarit ti biktima ti suspek a rummuar iti balay daytoy.
Iti met pannakiuman ti Bombo Radyo La Union iti suspek, kinuna na nga agarop alas 7:00 idi rabii a tinurongna ti balay nga ayan ti kabsat daytoy ket dagus na a tinagbat iti namindua a daras ti teltel na a dagus met a nakatayan ti biktima.
Dipensa ti suspek nga inunaan na laeng ti kabsat daytoy agsipudta adda met ti iggem ti biktima a buneng.
Inpaganetget ti suspek nga awan iti anya a nagguraanda nga agkabsat sakbay ti krimen agsipudta nagkadua pay dagitoy a napan nagga-ik idi bigat kalman.
Mainaeg iti daytoy, dagus met a simmuko ti suspek kenni Barangay Kagawad Reynaldo Lopez kasaruno ti pannakaiturongna iti police station.
Ti suspek ken ti biktima ket agbsat ti ina.
Kabayatan, agbabawi man kuna na suspek iti inaramid na ngem nalpasen daytoy.
