LA UNION — Nangisayangkat ti peaceful rally iti non-government group a Save Pugo Movement iti Comelec office idiay Pugo, La Union idi Lunes, Agosto 19.
Daytoy ket tapno kiddawen nga imbestigaran ken aksiyunan iti naka-alarmaan dagiti residente seknan iti kellaat ken mapagdudua-an a panag-ngato ti bilang dagiti indibiduwal a nagpa-rehistro iti Comelec a naggapo iti sabali a lugar.
Maibasar iti datus nga inruar ti Save Pugo Movement, agpar-parang nga umabot ti 2,487 iti nag-apply para iti transfer of voter registration, ngem 1,386 iti inaprubaran ti Comelec municipal office.
Iti nasao a bilang ket nai-record manipud Pebrero 12 agingga Agosto 15 ti agdama a tawen.
Dagiti nasao nga indibiduwal ket nagparehistro iti 13 a naduma-duma a barangay ti nasao nga ili.
Iti Pugo ket buklen ti 14 a barangay, addaan ti 12,786 registered voters idi 2022 elections, ken maysa a fifth-class municipality.
Kidkiddawen ita ti grupo nga imbestigaran a dagus ti Comelec ken LGU officials iti nasao nga alegasyon seknan iti maipagarop nga illegal voters’ registration tapno maliklikan ti posible a pannaka-pasamak ti panagsauran iti eleksiyon inton 2025.
Iti kapada nga alegasyon ket maipagarop a mapas-pasamak pay idiay ili nga Agoo, La Union.
