BR LA UNION – Nakabotos ti maysa a masikog a babae iti laksid ti napasaran na a panagsakit ti tiyan, senyales ti panag-pasikal na wenno panaganak na ita nga aldaw ti eleksiyon.
Segun kenni Jobert Ticman, maysa nga election monitor, naka-isem pay ti babai bayat a maal-alaan ti litrato iti laksid ti marikrikna na a panagsakit ti tyan.
Kalpasan a nagbotos, dagus a nagturong iti kaasetgan a clinic tapno agpasngay.
Kabayatanna, maysa a senior citizen ti pimmusay kalpasan ti panagbotos na idiay Barangay Gayaman, Binmaley, Pangasinan.
Segun iti Parish Pastoral Council for Responsible Voting (PPCRV), adda pay laeng iti pila ti nasao a nataengan ket maipagarop a nakapadasen ti narigat a panaganges gapwanan ti nakaru a kinabara ti panawen.
Kalpasan a nagbotos, nakarikna ti pannaka-ulaw agingga a naawanan ti puot.
Naideklara a natay babaen kadagiti medic pasado alas-7 ti agsapa, Mayo 12, 2025.
