LA UNION – Saan pay a makaited iti konkreto a konklusyon ti special investigation task group maipapan ti pannakapapatay kenni Congressman Eufranio “Franny” Eriguel ken kadagiti dua a body guard daytoy idiay ili ti Agoo, La Union.
Iti pannakiuman ti Bombo Radyo kenni Supt. Marlon Paiste, information officer ti Police Regional Office-1, kinunana nga agingga ita ket saan pay a natukoy iti pakabigbigan ti mastermind iti napasamak a pammapatay ti mammanday-linteg.
Manayunan pay dagiti makaswan base iti imbestigasyonda ti insidente.
Sigun kenni Paiste, ni Felizardo Villanueva a naabak a kandidato para barangay kapitan ti Barangay Capas, Agoo iti nabigbig pay laeng a suspek gapu kadagiti nakalap nga ebidensya ken testimonya dagiti imbestigador.
Karaman kadagiti pammaneknek a maikokoordinar ni Villanueva kadagiti dadduma pay a suspek ken dagiti mensahe iti cellphone a nakompiskar ti pulisya.
Innayon pay ni Paiste, agtaltalinaed a nakakaem iti bibig ni Villanueva nga ita ket nakabalud idiay Agoo Police Station, ken maysa met nga abogado manipud iti Publice Attorney’s Office ti maipagarup a mangiggem ti sangsanguen daytoy a kaso a multiple murder.
Impanamnama ti opisyal nga agsungbat iti amin a nagkikinnutsabo a nangpapatay ti sigud a kongresista ken iti dua a body guards daytoy.
