BR LA UNION – Simrek iti finals ti Britain’s Got Talent Season 19 iti Filipino singer a ni Matty Juniosa kalpasan a makagun-od ti maikadwa a Golden Buzzer manipud kadagiti hurado ti kompetisyon.
Iti semi-finals round, pinabilib ni Matty dagiti agbuy-buya ken hurado iti nabileg a rendition na iti kanta a ”Dream On” ti Aerosmith.
Gaputi performance na, timmakder ken nangipaay ti standing ovation iti uppat a hurado nga isuda Simon Cowell, Amanda Holden, Alesha Dixon, ken KSI, agraman iti live audience.
Rinaem ni Alesha iti Pinoy singer, ken inawaganna ti performance nga “effortlessly sensational” ken maysa a “masterclass” a panagkanta.
Iti udi, ni Amanda ti nang-pindot ti Golden Buzzer, a nangipaay kenni Matty ti direkta a tiket agturong iti finals.
Maipalagip nga immuna a nakaawat ti Golden Buzzer ni Matty manipud kenni Simon iti audition na ken nangiturong kenkuana iti semifinals.
Agdama nga agnanaed ni Matty idiay Glasgow, Scotland, ken agtrab-trabaho kas part-time waiter bayat nga aktibo pay nga agper-perform iti teatro sadiay.
