BR LA UNION – Kit-kitaen ita ti Philippine National Police (PNP) ti posibilidad nga sniper iti nangpaltog ken nangpatay kenni Rizal Mayor Joel Ruma idiay Cagayan idi rabii ti Miyerkoles, Abril 23, 2025.
Iti presscon idi kalman idiay Camp Crame, inyanunsyo ni PNP Public Information Office Chief Col. Radulf Tuaño a maysa laeng a tama ti kalibre 5.56 a paltog, a simrek iti kannawan nga abaga ken limsut iti likod a paset ti bagi ti biktima, iti nakatayan daytoy.
Narekober iti maysa a basyo ti bala ti paltog iti lugar a posible a nagtakderan ti gunman tapno paltugan ti incumbent Mayor.
Kabayatanna, agtultuloy nga im-imbestigaran ti pulisya nu naki-pinnaltog dagiti 4 a local police security kalpasan iti pannakadunor ti tallo nga indibidwal iti insidente.
Dagiti uppat a pulis ket nakatuding a maipasidong iti paraffin test agraman iti service firearms tapno masiguro nu nagpaputok ti paltog dagiti nasao nga indibidwal.
Mainaig ti daytoy, nangbukel ti maysa nga Special Investigation Task Group iti PNP-PRO II a mangtutok iti kaso.
