Nadundunor ti maysa a babae kalpasan a naaksidente idiay Naguilian, La Union.
Ti nasao nga aksidente ket pakaibilangan dagiti dua a behikulo.
Ti vehicle 1 ket maysa a Honda Click 125, adaan plate number MV A04-14-003981 ken minaneho ni Krisha Pauline Padilla, agtawen 27, balasang, mangmanged kas dining staff, ken residente ti Barangay Ortiz, Nagulian, La Union.
Ti met vehicle 2 ket maysa a L200 Strada Double Cab, adaan plate number RDJ111, nabigbig ti driver a ni Sergio Banayat Jr, agtawen 44, naasawaan, residente ti Barangay Gusing Norte, Nagulian, La Union.
Maibasar ti inisyal nga imbestigasyon ti Nagulian Police Station, sakbay a napasamak iti aksidente, dagiti agpada a behikulo ket agpada a dumaldalyasat ti agpadaya-a-laud a direksyon. Idi a nadanunda ti nakapasamakan ti aksidente, iti L200 Strada Double Cab ket kellaat a nagsardeng ti kannagid a paset ti kalsada gapuanan ti pannakadungpar ti motorsiklo ti likudan a paset daytoy.
Gapu iti napasamak, nagresulta ti pannakadundunor ti nagduduma a paset ti bagi ti driver ti motorsiklo ken dagus a naiturong idiay Naguilian District Hospital para ti pannakatameng daytoy.
Agpada a nakailista ti perdisyon ti dua a lugan a awan pay pakabuklan a gatad na.
Gapu iti insidente, nagballaag met dagiti kapulisan kadagiti motorista a kanayon nga agannad nangruna no matutudo gapu ta nagalis iti kalsada.
