Maysa a mangalap ti pimmusay kalpasan a maipagarup a nakimat bayat nga adda iti baybay idiay Agoo, La Union.
Nabigbig ti natay a bitkima a ni Benjie Buyan, 34 anyos, addaan asawa, residente ti Barangay Baluarte, Agoo, La Union.
Maibasar ti panakiuman ti Bombo Radyo News Team iti kabsat ti biktima a ni Victor Buyan, iti oras alas-3:10 ti malem, nagturongda a dua ti baybay tapno agkalap ngem idi madanon iti alas-5 ti malem, naabutan dagitoy iti napigsa a buyat ti tudo ken kimat.
Maibasar pay ti salaysay ti kabsatna, kalpasan ti agkakapigsa a kimat, nakita na laengen ti kabsatna a dara-dara ken saanen nga agang-anges.
Dagus met isuna a nagkiddaw ti tulong kadagiti kakadwada a mangalap ken dagusda nga inyawid ti dara-dara a kabsatna ti pagtaenganda.
Ita, agladladingit ti pamilya Buyan gapu ti kellaat a pannakatay ni Benjie gapu ti saan a ninamnama a pasamak.
Nagpalagip met ti kabsat ti biktima kadagiti mangalap nga saanen a tumapog iti kabaybayan no makita a saan a nasayaat ti panawen tapno maliklikan ti kapada a pasamak.
