BR LA UNION – Nakaaramid ti pakasaritaan iti Philippine Men’s National Football Team iti SEA Games kalpasan nga inabak da ti defending champion nga Indonesia 1-0.
Gaputi nasao a panangabak ti Pilipinas, immabante daytoy iti semifinals idinto a nangikabil met daytoy ti peligro iti Indonesia a ma-eliminate iti group stage.
Daytoy ti umuna a gundaway, iti napalabas a 34 a tawen, a nakastrek ti men’s football team iti semifinals iti ay-ayam a naisayangkat idiay Chiang Mai, Thailand.
Ti kakaisuna a naka-goal ket ni Otu Banatao iti 45+1 sakbay ti halftime.
Iti agdama, adda dua a panangabak ken awan pay abak da iti men’s football team ti pagilian para iti group stage.
Idi 1991 SEA Games a naisayangkat ditoy pagilian, napaay ti Pilipinas iti Singapore 2-0 para iti bronze medal match.
Immuna nga inabak ti Pilipinas iti Myanmar 2-0, ken ur-urayen laengen ti Pilipinas iti top team iti Group A wenno B para iti semifinals matchup a maisayangkat inton Disyembre 15.
