Milyones a gatad ti marijuana ti pinarut ken pinuoran dagiti otoridad ti PDEA RO1 babaen iti nagsaruno nga aldaw a joint eradication operation.
Babaen ti nagbinnulig a kameng ti PDEA RO I – Ilocos Sur Provincial Office (PDEA RO I-ISPO), PDEA La Union Provincial Office (PDEA LUPO), PDEA National Special Enforcement Team – Luzon 1 (PDEA NSET), Sugpon Police Station ken Mount Agay ket nabirukan ken nadadael dagiti maiparit a mula iti mapagsusupiatan a beddeng ti Barangay Licungan, Sugpon, Ilocos Sur ken Barangay Tacadang, Kibungan, Benguet.
Kinuna ni PDEA RO I Regional Director, Director III Joel B Plaza a naparut ken nadadael manipud ti operasyon ti aganay 10,800 pidaso a fully grown marijuana plants, 3,500 pidaso ti marijuana seedlings nga adda pakabuklan presyo a P23M manipud kadagiti tallo a plantation sites iti bantay nga aglawa ti 1,550 square meters idi Pebrero 19, 2025.
Kabayatanna, iti kasaruno metlaeng nga aldaw idi Pebrero 20 ket naparut ken nadadael met ti aganay 14,400 pidaso a fully grown marijuana plants nga aggatad ti P2,880,000 manipud ti sabali pay a plantation site nga aglawa ti 1,800 square meters.
Dagiti marijuana ket nadadael ken pinuoran dagiti otoridad iti mismo a lugar a nakaparutan da kalpasan ti operasyon.
