BR LA UNION – Arestado iti maysa a Filipino American, a ministro ti Iglesia Ni Cristo (INC), nabigbig iti nagan a Glennon Salvador Payabyab, a maipagarop a nanggandat a maki-sinnarak iti maysa a 12-anyos a balasitang ken maipagarop a nagpatulod pay iti saan a maiparbeng a mensahe iti ubing a babai.
Ni Payabyab, 43, ket inarestar dagiti otoridad idi Abril 3 idiay Springville, Staten Island, New York ngem nawaya-wayaan kalpasan iti awan pay 24 nga oras, ngem nangparnuay daytoy ti buteng iti komunidad.
Ni Liza Vetland, maysa a kaarruba ni Payabyab, ket imbinglay na ti karirikna na iti social media, ket imbaga na a panagrikna da ket saan a natalged iti pamilya da, nangruna ket asideg laeng iti balay ni Payabyab kadakuada.
‘He lives down the block from my home. He is always around children,’ ani nito.
Nangipeksa ti amak ni Vetland agsipudta iti order of protection nga iggem da ket saan nga umanay tapno maprotektaran dagiti annak-na, nga ita ket mabuteng da a magmagna nga agawid manipud iti pagadalan.
Kabayatanna, maysa nga operasyon manipud Protect Our Children ken New York Police Department iti nagresulta ti pannaka-aresto ni Payabyab kalpasan nga inawis na ti ubing a makisinnarak kenkuana.
Ni Payabyab ket sumangsango ita ti kaso nga ‘Endangering the welfare of a child’ wenno class A misdemeanor.
Ti nasao a kaso ket nangparnuay ti adu a reaction manipud kadagiti padana nga INC member, ken ibagbaga da a maysa daytoy nga isolated case ken agpan-panawagan da ti hustisya ken accountability.
