Pormalen a tinurpos ti Iglesia ni Cristo (INC) ti tallo nga aldaw a rally, maibasar iti inyanunsyo ti tagapagsarita dagitoy idi kalman, Huwebes, Hulyo 2.
Iti maysa a video message, nagyaman ti tagapagsarita ti INC a ni Edwil Zabala kadagiti dimmar-ay iti tallo aldaw a panagu-ummong, kasta metten kadagiti personalidad a nangipeksa ti suporta ken kadagiti pulis a nangipaay ti seguridad iti nasao a rally.
Segun kenni Zabala, mamati da a nalawag ti indanon da a mensahe kadagiti maseknan nga opisyal, ket mangnamnama da nga agpannuray ti hustisya ditoy pagilian, saan ketdi dagiti tattao a mangkil-killo ti linteg para iti bukod a pagimbagan .
Innayon ni Zabala a nalpasen iti insayangkat da a nakapya a rally ket mangnamnama da makaawid amin a natalged ken nakapya kas idi simmangpet dagitoy iti lugar a nangisayangkatan da ti rally.
Insayangkat ti religious sect ti umuna a dua nga aldaw a protesta idiay People Power Monument iti kawatiwatan ti Epifanio de los Santos Avenue (EDSA) idiay Quezon City.
Inyakar da ti panagtitipon dagitoy idiay Liwasang Bonifacio idiay Manila idi kalman kalpasan nga imbabawi ti lokal a gobyerno ti Quezon City iti permit tapno mangisayangkat ti rally iti nasao a monumento.
Maipalagip a nangisayangkat ti surprise rally ti INC idiay People Power Monument idi Martes kas panangipeksa ti suporta kenni Senador Rodante Marcoleta, a sumangsango iti kaso a plunder nga isagsagana ti Office of the Ombudsman.
Kinondenar ti religious sector iti inawagan da a “selective justice” wenno mapil-pili a pakaipat-patungpalan ti hustisya ken “distortion of law” seknan iti kaso ni Marcoleta.
Nagramot daytoy iti saanna a panangideklara ti 75 milyon a pisos a campaign contributions a naawat na manipud iti tallo a donor, kabilang iti sigud a kongresista a ni Mike Defensor.
