LA UNION – Naideklara a natay babaen iti attending physician iti La Union Medical Center idiay ili ti Agoo, iti maysa a mister gaputi sinagaba na a fatal stab wounds, kalpasan a binagsol iti kina-inninom na a baro idiay Barangay San Julian West ti nasao nga ili.
Nabigbig iti biktima a ni Jerry Fajardo, adda iti umno nga edad, maysa a construction worker, residente iti nasao a lugar.
Nabigbig met ti suspek iti nagan a Manny Ambalisa, 21, baro, tubo ti Sta Clara Quezon, Nueva Ecija.
Maibasar iti report, timpuar ti nabara nga argumento iti baetan dagiti dua bayat ti panaginom dagitoy ti arak.
Kas resulta, maipagarop a binagsol ti suspek iti biktima iti namindua a daras babaen iti kutsilyo.
Iti agdama, addan iti custodiya ti Agoo PNP iti suspek kalpasan a maarestar babaen iti tulong dagiti barangay officials.
