Krtikal ita ti kasasaad idiay ospital ti maysa a mister a pinaltugan iti riding in tandem suspects idiay kawatiwatan ti national highway ti Barangay San Pablo, ili Balaoan, La Union.
Nabigbig ti 41-anyos a biktima a ni Virgilio Medina, residente ti Barangay Paagan, ili ti Santol, La Union.
Naammuan ti Bombo Radyo manipud kadagiti nakaimatang ti napasamak a krimen, maipagarup nga agmanmaneho iti traysikelna ti biktima idi a paltugan daytoy iti dua a saan pay a bigbig a suspek nga agkalubbong iti maysa a motorsiklo.
Naglak-am iti sugat ti naduma-duma a paset ti bagina ti mister.
Maipagarup nga intulod ni Medina dagiti annakna ken agawid kuman daytoy idiay balayda idi a ginandat isuna a papatayen dagiti suspek.
Maibasar iti inisyal a panagsukimat iti kameng ti Balaoan Police Station, maysa a cal .45 a paltog ti maipagarup nga inaramat dagiti suspek base kadagiti naala a basyo ti bala manipud idiay crime scene.
Agtultuloy met iti hot pursuit operation ti pulisya kadagiti kabangibang nga ili para ti posible a pannakatiliw dagiti suspek.
