LA UNION – Pimmusay kabayatan nga maag-agasan iti Balaoan District Hospital ti maysa a mister kalpasan daytoy a mapaltogan kabayatan a magmagna iti kalsada idiay Barangay Calliat, ili ti Balaoan, La Union.
Nabigbig ti biktima a ni Joel Navalta, 41, drug surrenderee, ken residente iti nadakamat a lugar.
Naamuan a magmagna ti biktima nga agawiden manipud iti gayyem na idi paltogan ti suspek iti saan pay nga ammo a makagapu.
Segun kenni PMaj. Joefrey Sanchez, hepe ti Balaoan Police, 12 gauge shot gun ti inusar ti suspek iti pammaltog.
Agtultuloy pay nga am-amuen ti Scene of the Crime Operatives (SOCO) no manu ti tama iti bagi na ti biktima gaputa awan iti nakita nga empty shell iti nakapasamakan ti krimen.
