Tiniliw dagiti kameng ti Aringay Police Station ti maysa a mister gapu ti maipagarop a panangpatay na ti asawa na idiay Barangay Manga, Aringay, La Union.
Nabigbig iti biktima a ni Rellyn Ramos, 38, idinto a ti asawa na ket nabigbig a ni Ferdinand Ramos, 37, agpada dagitoy a residente ti nasao lugar.
Maibasr iti police report, nagresponde ti Aringay Police Station kadua ti Rural Health Unit iti maipagarop a parricide insident.
Ditoy a nakitada a nakadasay ti biktima a nagsagaba ti dunor iti nadumaduma a paset ti bagi dagitoy. Indeklara met a dead on the spot ti biktima babaen iti nagresponde a RHU personnel.
Iti imbestigasyon dagiti otoridad, inbaga ti menor de edad nga anak ti agasawa a nangngeg na nga agrikrikyar dagitoy iti uneg ti silid da agingga a nadiskubrena a nakadasy ti ina na ken awan ti puot daytoy.
Dagus metten nga tiniliw dagiti nagresponde a pulis ti suspek nga adda met laeng iti lugar.
Immuna pay a naiturong ti suspek iti La Union Medical Center tapno ma-eksamin ken kalpasan na naiturong iti pagbaludan.
Kabayatan, kiniddaw met ti Aringay Police Station ti tulong ti Scene of the Crime Operatives (SOCO) para iti pannakaiproseso ti crime.
Agtultuloy met ti imbestigasyon dagiti otoridad iti nasao a krimen.
