LA UNION – Pormalen a napirmaan iti maysa a katulagan iti baetan ti pulisiya ken lokal a gobyerno idiay ili ti Bacnotan, maipapan iti ipatungpal a clean up drive wenno panagdalusan iti aglawlaw.
Maibasar iti nakalap nga impormasyon ti Bombo Radyo La Union, iti Memorandum of Agreement (MOA) ket pinirmaan da PCI Reynaldo Soria kas hepe ti pulisiya ken Mayor Francisco Fontanilla idiay Bacnotan, La Union.
Dimmar-ay pay iti nasao a signing of MOA da Napolcom Region One Director Evangeline Almirante ken PS/Supt. Ricardo Layug Jr. kas OIC provincial director iti La Union PNP (LUPPO).
Daytoy ket paset iti 23rd PCR batch anniversary a masel-selebraran ita nga aldaw, nga addaan ti tema ita a tawen – “ Tapat na Serbisyo at Paglilingkod ng Kapulisan, Kaagapay ng Mamamayan, Hatid ay Kaunlaran.”
Partikular a pangisayangkatan ti panagdalusan dagiti otoridad ken kameng ti munisipiyo agraman dagiti barangay officials ket idiay Barangay Poblacion ken Nagsimbaanan, Bacnotan, La Union.
