Kayat nga iprayoridad ni Senador Alan Peter Cayetano ti modernisasyon ti Philippine Institute of Volcanology and Seismology weno PHIVOLCS kalpasan ti nabiit pay a nakapsot a panagbettak ti Bulkang Taal.
Segun kenni Senador Cayetano, agserbi a “wake-up call” ti napasamak ti pagilian para iti panagsagana iti kapada a didigra iti aniaman nga oras.
Dinakamat ti mamanday-linteg iti plenaryo ti kinapateg ti kaadda ti panagsagana kadagiti didigra a nagtaud kadagiti natural hazards.
Impaganetget ni Cayetano a panggep ti paitantandudo a PHIVOLCS Modernization Act a kissayan ti epekto ken perdisyon dagiti didigra, makasagana, ken nu kasatno a maalagaan ti aglawlaw ti Pilipinas.
Innayon pay ti senador, ti agdama ket 10 laeng manipud kadagiti 24 nga aktibo a bulkan ditoy pagilian ti kabaelan nga i-monitor ti PHIVOLCS, ken ti Taal ken Mayon laeng ti addan da iti kumpleto a monitoring system.
