BR LA UNION – Nadundunor ti maysa a lalaki kalpasan a naidungpar ti man-manehuen na a motorsiklo iti nakaparada a traysikel iti kawatiwatan ti Mabini Street, Barangay Catbangen, San Fernando City, La Union idi parbangon ti Lunes, ti Marso 16, 2026.
Karaman iti nasao a vehicular traffic incident ti motorsiklo nga awanan plaka ken minaneho ti managan Matt David Salindong, agtawen ti 30, awanan asawa, maysa a kusinero, residente iti nasao a barangay ken maysa a motorized tricycle a nakaparada iti daya a paset ti kalsada.
Maibasar iti inisyal nga imbestigasyon, agdal-dalyasat ti motorsiklo iti abagatan a paset ti kalsada idi maipagarop a na-lost control ti driver ti manibela, nakaigapwan ti pannakaidungpar na iti traysikel.
Kas resulta, nagsagaba ni Salindong ti pannakadundunor iti bagi ken naiturong idiay Ilocos Training and Regional Medical Center (ITRMC) ditoy siudad ti San Fernando para iti pannakaagasna.
Naammuan pay iti inisyal nga imbestigasyon dagiti nagresponde a pulis nga awan ti driver’s license ti driver ti motorsiklo.
Agtultuloy ti imbestigasyon dagiti kameng ti City of San Fernando Police Station tapno maamwan ti dadduma pay a detalye iti insidente.
