BR LA UNION – Natay iti maysa a motorcycle rider kalpasan a natinnag ken nalmes iti irrigation canal idiay Luna, Isabela.
Ti biktima ket nabigbig iti nagan a Nestor De Vera, 25-anyos, residente ti Reina Mercedes, Isabela.
Maibasar iti report a naawat ti Bombo Radyo Cauayan manipud Luna Police Station, dumaldalyasat ti biktima iti kawatiwatan ti kalsada idiay Purok 1, Barangay Dadap, Luna, Isabela idi maipagarop a na-lost control iti man-manehuenna a motorsiklo, a nakaigapwan ti pannakai-tapuak ken pannakalmes na iti irrigation canal.
Dagus a nagresponde dagiti otoridad ket dagus nga inturong da iti ospital idi naiya-un da iti bagi ti biktima, ngem naideklara a dead-on-arrival.
Mainaig ti daytoy, nagpalagip manen dagiti otoridad kadagiti motorista nga agannad iti panag-maneho nangruna kadagiti delikado a kalsada a posible a pakapasamakan ti aksidente.
